25°C
Thrissur
Cultural Desk (1856)
എരുമപ്പെട്ടി: വിജയദശമി ദിനാഘോഷത്തോടനുബന്ധിച്ച് കടങ്ങോട് പഞ്ചായത്തിലെ നൃത്ത വിദ്യാര്‍ത്ഥികള്‍ക്ക് ചിലങ്ക വിതരണം ചെയ്തു. കലയെ പ്രോത്സാഹിപ്പിക്കുന്നതിന്റെ ഭാഗമായി ജനകീയാസൂത്രണ പദ്ധതിയിലുള്‍പ്പെടുത്തി 28 കുട്ടികള്‍ക്കാണ് നൃത്ത പരിശീലനം നല്‍കുന്നത്. പഞ്ചായത്ത് പ്രസിഡന്റ് രമണി രാജന്‍ വിതരണോദ്ഘാടനം നിര്‍വ്വഹിച്ചു. സ്റ്റാന്റിംഗ് കമ്മറ്റി ചെയര്‍മാന്‍ അഡ്വ.കെ.എം നൗഷാദ് അധ്യക്ഷനായി. സ്റ്റാന്റിംഗ് കമ്മറ്റി ചെയര്‍മാന്‍മാരായ ജലീല്‍ ആദൂര്‍, കെ.ആര്‍.സിമി, ബ്ലോക്ക് പഞ്ചായത്തംഗം എ.എം മുഹമ്മദ് കുട്ടി, പഞ്ചായത്ത് അംഗം കാഞ്ചന മോഹന്‍ എന്നിവര്‍ സംസാരിച്ചു.
കുന്നംകുളം: കക്കാട് ശ്രീ മഹാ ഗണപതി ക്ഷേത്രത്തില്‍ പഞ്ചാരിമേളം അരങ്ങേറ്റം നടത്തി. കക്കാട് വാദ്യകലാക്ഷേത്രം രാജപ്പന്‍മാരാരുടെ ശിക്ഷണത്തില്‍ ഒരു വര്‍ഷക്കാലമായി പഞ്ചാരിമേളം അഭ്യസിച്ചു വരുന്ന 10 ബാലപ്രതിഭകളാണ് വിജയദശമി നാളില്‍ ക്ഷേത്രാങ്കണത്തില്‍ അരങ്ങേറ്റം കുറിച്ചത്. ചടങ്ങില്‍ പത്മശ്രി ടി.എസ് സുന്ദര മേനോന്‍, ഇ രഘുനന്ദനന്‍, അമ്മാട്ട് വിനോദ്, ഇ.എന്‍ ശ്രീകാന്ത്, എന്നിവര്‍ സംബന്ധിച്ചു.
ജില്ലാ ലൈബ്രറി കൗണ്‍സിലിന്റെ ആഭിമുഖ്യത്തില്‍ സംഘടിപ്പിച്ച മൂന്നാമത് ജില്ലാ ലൈബ്രറി കലോത്സവമായ അക്ഷരോത്സവം തൃശൂരില്‍ ആരംഭിച്ചു. പ്രളയദുരിതം കണക്കിലെടുത്ത് ഉദ്ഘാടന ചടങ്ങുകള്‍ ഒഴിവാക്കിയാണ് കലോത്സവം ആരംഭിച്ചത്. ഗവണ്‍മെന്റ് മോഡല്‍ ഗേള്‍സ് സ്‌കൂളില്‍ നാലുവേദികളിലായാണ് മത്സരങ്ങള്‍ അരങ്ങേറുന്നത്. യു.പി., ഹൈസ്‌കൂള്‍, വിഭാഗങ്ങളിലായി നാടന്‍പാട്ട്, ലഘുനാടകം, കഥാപ്രസംഗം, കവിതാലാപനം, പ്രസംഗം എന്നിങ്ങനെ 14 ഇനങ്ങളിലാണ് മത്സരങ്ങള്‍. ജില്ലയിലെ 6 താലൂക്കുകളില്‍ നിന്നെത്തിയ 400-ഓളം വിദ്യാര്‍ത്ഥികളാണ് മത്സരങ്ങളില്‍ മാറ്റുരയ്ക്കുന്നത്. വിജയികളാകുന്ന ഒന്നാം സ്ഥാനക്കാര്‍ ഈ മാസം 28ന് തൃശൂര്‍ ഗവണ്‍മെന്റ് എഞ്ചിനിയറിംഗ് കോളേജില്‍ നടക്കുന്ന സംസ്ഥാന സര്‍ഗോത്സവത്തില്‍ പങ്കെടുക്കും. അതേ സമയം ജില്ലാ കലോത്സവത്തിന്റെ സ്റ്റേജിതര മത്സരങ്ങള്‍ ഈ മാസം 21ന് വിയ്യൂര്‍ ഗ്രാമീണവായനശാലയിലും നടക്കും.
നവരാത്രി മഹോത്സവത്തിന്റെ ഭാഗമായി വിയ്യൂര്‍ ശിവക്ഷേത്രത്തില്‍ കീര്‍ത്തനാലാപനം അരങ്ങേറി. ധന്യ കലാക്ഷേത്രയിലെ അദ്ധ്യാപകനും, സോപാനരത്‌ന അവാര്‍ഡ് ജേതാവുമായ കെ.ജി. രവീന്ദ്രന്റെയും ശിഷ്യരുടെയും നേതൃത്വത്തിലാണ് കീര്‍ത്തനാലാപനം നടന്നത്.
ചേര്‍പ്പ്: നവരാത്രി മഹോത്സവത്തോടനുബന്ധിച്ച് ഊരകത്തമ്മ തിരുവടി ക്ഷേത്രത്തിലെ കുലവാഴ വിതാനത്തിന് ആരംഭമായി. ഊരകം ക്ഷേത്രത്തിലെ നടപ്പുരയില്‍ ക്ഷേത്ര ഉപദേശക സമിതിയുടെ നേതൃത്വത്തിലാണ് കുലവാഴകള്‍ വിതാനിക്കുന്നത്. ഊരകം, ചേര്‍പ്പ്, ആറാട്ടുപുഴ, കരുവന്നൂര്‍ എന്നിവിടങ്ങളില്‍ നിന്നായാണ് കുലവാഴകള്‍ ശേഖരിച്ചിരിക്കുന്നത്. വാഴക്കുലകള്‍ ക്ഷേത്രത്തിലെ കിഴക്കേ ഗോപുരത്തിനു താഴെ പ്രത്യേകം തയ്യാറാക്കിയ അറയിലാണ് പഴുപ്പിച്ച് എടുക്കുക. എല്ലാവര്‍ഷവും ക്ഷേത്രത്തില്‍ മഹാനവമി ദുര്‍ഗാഷ്ടമി ദിനങ്ങളില്‍ കുലവാഴകള്‍ വിതാനിക്കും. നവരാത്രിയോടനുബന്ധിച്ച് നടക്കുന്ന കുലവാഴവിതാനത്തിനായി ആയിരത്തോളം വാഴകുലകളാണ് ഭക്തര്‍ ക്ഷേത്രത്തില്‍ സമര്‍പ്പിച്ചിരിക്കുന്നത്. പ്രളയം മൂലം വാഴ കൃഷി നാശം സംഭവിച്ചതിന്നാല്‍ ഈ വര്‍ഷം കുലവാഴവിതാനതിനായി ഊരകം ദേശത്തിന് പുറമേ മറ്റുള്ള സ്ഥലങ്ങളില്‍ നിന്നും കുലവാഴകള്‍ എത്തിയെന്ന് ഊരകംക്ഷേത്രം ഉപദേശക സമിതി പ്രസിഡണ്ട് അയച്ചിയില്‍ രാധാകൃഷ്ണന്‍ പറയുന്നു. വിജയദശമി ദിനത്തില്‍ ക്ഷേത്ര നടപ്പുരയില്‍ വിതാനിച്ച കുലവാഴകള്‍ ഭക്തര്‍ക്ക് പ്രസാദമായി നല്‍കും.
ഗുരുവായൂര്‍: ഗുരുവായൂര്‍ ക്ഷേത്രത്തില്‍ എഴുത്തിനിരുത്തല്‍ ചടങ്ങിനുള്ള ഒരുക്കങ്ങള്‍ പൂര്‍ത്തിയായി. ക്ഷേത്രത്തിലെ 13 കീഴ്ശാന്തി കുടുംബങ്ങളിലെ കാരണവന്മാരാണ് കുരുന്നുകള്‍ക്ക് ആദ്യാക്ഷരം പകര്‍ന്നു നല്‍കുക. ചൊവ്വാഴ്ച വൈകിട്ട് ഗ്രന്ഥങ്ങള്‍ പൂജക്ക് സ്വീകരിച്ചു. ക്ഷേത്രത്തിലെ ഓതിക്കന്‍ മൂന്നുനേരം സരസ്വതി പൂജ നടത്തും. വെള്ളിയാഴ്ച രാവിലെ സരസ്വതീ പൂജക്ക്‌ശേഷം കുളപ്പുര മാളികയുടെ താഴത്തെ ഹാളിലാണ് എഴുത്തിനിരുത്തല്‍.
ഗുരുവായൂര്‍: മമ്മിയൂര്‍ ക്ഷേത്രത്തില്‍ ഗ്രന്ഥപൂജ തുടങ്ങി. മഹാനവമി ദിനത്തില്‍ ഗുരുവായൂര്‍ മുരളിയുടെ നാദസ്വര കച്ചേരി, പഞ്ചരത്‌ന കീര്‍ത്തനാലാപനം, ഡോ.ജി.ഭുവനേശ്വരിയുടെ സംഗീത കച്ചേരി എന്നിവ ഒരുക്കിയിട്ടുണ്ട്. പുലര്‍ച്ചെ തന്ത്രി ചേന്നാസ് നാരായണന്‍ നമ്പൂതിരിപ്പാടിന്റെ മുഖ്യകാര്‍മ്മികത്വത്തില്‍ വേദസാര ലളിത സഹസ്രനാമ ലക്ഷാര്‍ച്ചന നടക്കും. വെള്ളിയാഴ്ച രാവിലെ 8 മുതല്‍ നവരാത്രി മണ്ഡപത്തില്‍ പൂജകള്‍ക്ക് ശേഷം കുട്ടികളെ എഴുത്തിനിരുത്തും. പരിസരങ്ങളിലുള്ള തിരുവെങ്കിടാചലപതി ക്ഷേത്രം,ചാമുണ്ഡേശ്വരി ക്ഷേത്രം,ബ്രഹ്മകുളം ശിവക്ഷേത്രം,പാര്‍ഥസാരഥി ക്ഷേത്രം,കോതകുളങ്ങര ക്ഷേത്രം,പെരുന്തട്ട ശിവക്ഷേത്രം എന്നിവിടങ്ങളിലും എഴുത്തിനിരുത്തല്‍ നടക്കും.
പാവറട്ടി: തൊയക്കാവ് സേക്രഡ് ഹാര്‍ട്ട് ദേവാലയത്തില്‍ ഈശോയുടെ തിരുഹൃദയ ദര്‍ശന തിരുനാള്‍ ആഘോഷിച്ചു. ആഘോഷമായ തിരുനാള്‍ ദിവ്യബലിക്ക് ഫാ. പോള്‍ തേക്കാനത്ത് കാര്‍മികനായി. വികാരി ഫാദര്‍ ക്ലമന്റ് വാഴപറമ്പില്‍, കൈക്കാരന്‍മാര്‍ എന്നിവര്‍ നേതൃത്വം നല്‍കി.
ചേര്‍പ്പ്: തിരുവുള്ളക്കാവില്‍ പൂജവെപ്പിനും വിദ്യാരംഭത്തിനുമുള്ള ഒരുക്കങ്ങള്‍ പൂര്‍ത്തിയായതായി തിരുവുള്ളക്കാവ് ദേവസ്വം സെക്രട്ടറി കുമാരന്‍ അറിയിച്ചു. തിരുവുള്ളക്കാവ് വാരിയത്തെ ശ്രീധരവാര്യരുടെ നേതൃത്വത്തിലുള്ള ആചാര്യന്മാരാണ് എഴുത്തിനിരുത്തല്‍ ചടങ്ങ് നടത്തുക. വാഹന പാര്‍ക്കിങ്ങിനായി ദേവസ്വത്തിന്റെ ഗ്രൗണ്ടിലും 2 സ്വകാര്യ വ്യക്തികളുടെ സ്ഥലങ്ങളിലുമായി സൗകര്യമൊരുക്കിയിട്ടുണ്ട്. വിദ്യാരംഭ ദിവസം സുരക്ഷാ ക്രമീകരണത്തിനായി പൊലീസിനു പുറമെ 150-ഓളം വളണ്ടിയര്‍മാരുടെ സേവനവും ഒരുക്കിയിട്ടുണ്ട്.
ചേര്‍പ്പ്: ഒല്ലൂര്‍ സെന്റ് ആന്റണീസ് ഫൊറോന പള്ളിയിലെ വിശുദ്ധ റപ്പായേല്‍ മാലാഖയുടെ തിരുനാളിന് കൊടിയേറി. മാര്‍ ജേക്കബ് തൂങ്കുഴി തിരുനാള്‍ കൊടിയേറ്റം നിര്‍വ്വഹിച്ചു. വികാരി ഫാദര്‍ ജോസ് കോനിക്കര, സഹവികാരിമാരായ ഫാദര്‍ ജിയോ ചിരിയങ്കണ്ടത്, ഫാ.ക്രിസ്റ്റീന്‍ ചിറമ്മല്‍ എന്നിവര്‍ നേതൃത്വം നല്‍കി. ഈ മാസം 23, 24 തീയതികളില്‍ ആണ് വിശുദ്ധ റാഫേല്‍ മാലാഖയുടെ തിരുനാള്‍.
Other Head Lines
-
പ്രീ - പ്രൈമറി ടീച്ചേഴ്സ് അസോസിയേഷന് ജില്ലാ കണ്വെന്ഷന് നടന്നു
-
പൂരപ്രേമി സംഘത്തിന്റെ ആഭിമുഖ്യത്തില്‍ 'സര്വ്വാര്പ്പണം' നടത്തി
-
7 ബി.ജെ.പി. പ്രവര്ത്തകര് അറസ്റ്റിൽ
-
മാധ്യമ പ്രവര്ത്തകര് പ്രതിഷേധ പ്രകടനം നടത്തി
-
സംസ്ഥാന പഠനക്ലാസ് സംഘടിപ്പിച്ചു
-
പാറമേക്കാവ് ദേവസ്വം അഗ്രശാലയില് സംഗീതകച്ചേരി അരങ്ങേറി
-
നാമജപഘോഷയാത്ര സംഘടിപ്പിച്ചു
-
ടാര്വീപ്പകളും ഒരുപോലെ അപകടഭീഷണി സൃഷ്ടിക്കുന്നതായി പരാതി
-
ഹര്ത്താലിനോടനുബന്ധിച്ച് ജില്ലയിലെ വിവിധ മേഖലകളില് പ്രതിഷേധ പരിപാടികള് സംഘടിപ്പിച്ചു
-
ഒല്ലൂര്‍ റോഡിന്റെ ടാറിങ്ങ് പൂര്ത്തിയാക്കണമെന്ന നാട്ടുകാരുടെ ആവശ്യം ശക്തമാകുന്നു
